جميل راتب
جميل راتب
أول ما اتخرجت كنت عايز أروح أبارك لصديق ليا كان لسه متجوز ومكنش معايا يومها فلوس حطيتله ٥٠ جنيه في ظرف مع كرت كتبت عليه :
الله يعلم والأيام تعلمنا ، أنّا كرامٌ ولكنا مفلسين.
صديقي بيقولي إن الكارت ده الوحيد اللي لسه محتفظ بيه بعد ما يقارب من ٢٠ سنة جواز.
لأنه كان جدا متميز ومملوء بالعفوية والمصداقية.
أول ما اتجوزت كل الأقارب والأصدقاء اللي جم زاروني جابوا معاهم تورتات وشيكولاتات ،
وفي الغالب كنا ناكل حاجة بسيطة ونديهم للحارس يوزعهم ، ما عادا صديق واحد
لقيته جايبلي كيس مليان زيت وسكر وتونة ومكرونة وحاجات كتير من حاجة البيت.
قالي معلش مقدرتي مش كبيرة دي حاجات إنت هتحتجها.
دلوقتي أنا مش فاكر كل الناس اللي جاتلي لكن مستحيل أنساه هو لأنه كان متميز جدا من خلال صدقه وعفويته.
والد أحد أصدقائي طبيب مشغول جداً بإلتزامات لا نهائية بدعيله دايماً في صلاتي.
لو سألتني عن أكتر حاجة مميزة فيه هقلك عمري ما كلمته أو بعتله رسالة إلا ورد عليا.
ولو مردش يرجع يتصل بيا مفيش مرة واحدة نسي ، رغم كل مشاغلة كان دايما بيرد عليه.
كنت بسافر بالقطار في موعد متكرر وكان في واحد بشوفه كتير بس معرفوش.
في مرة في عز الشتاء وإحنا مستنيين القطار الصبح لقيته نادى على عمال النظافة وجابلهم شاي وطبطب على ظهر واحد منهم ودعالهم ربنا يقويهم ومشي.
لحد دلوقتي بحاول أكرر الحاجة دي اللي اتعلمتها منه وبدعيله وأنا عمري ما إتكلمت معاه ولا شفته تاني من ١٥ سنة.
إقرأ أيضا: علبة البسكويت
أسهل وأجمل حاجة ممكن تقدمها لنفسك وللي حواليك إنك تكون إنسان لطيف ، دي مش محتاجه فلوس ولا تكاليف.
الإبتسامة لطف.
إنك ترد على حد باعتلك رسالة لطف.
إنك ترد بذوق لطف.
وإنك تدي وقتك لحد محتاج من غير ما يطلب لطف.
إنك تدعي لحد بسيط وتحسسه إنك حاسس بيه لطف.
يمكن أنت تحس إن دي حاجات بسيطة ، لكنها حاجة كبيرة جداً عند ربنا أولاً ، ثم عند الناس.
