قصيدة مصري فوق الستين عام فأكثر عندي حنين
قصيدة و أبيات شعرية تظهر روعة ذوق الأدب العربي و أبلغ ما قاله
سوف تقرأ أبيات شعر ربما لأول مرة في حياتك تعرف عليها من خلال هذا المقال
عندى حنين جامد بيشدنى ﻷيام زمان
للترماى أبو سنجة اللى مافيهوش بيبان
لسبرتاية ووابور ساكت وعالى أبو دخان
عندى حنين للمنديل أبو أويا
وهيبة جدى أبو ابويا
ويشمك بنت الحارة
وكسوف بنت الجارة
والخلخال المدور ف كعوب النسوان
وقعدة حسن ومرقص وكوهين
أيام ما كان عندنا فعلاً دين
والاكلة يادوب تكلف قرشين
ولو ماعندناش عشاء نروح عند الجيران
عندى حنين لعصاية العسلية
والأكل نشيله جوة نملية
والسفرة كانت لمة على طبلية
والحلو نعمله مانشتريهوش من دكان
عندى حنين لعربية ولمبة الجاز
والشيش الخشب وراه قزاز
والنموسيه فوق سرير هزاز
وأوضة المسافرين ممنوعة لكائن من كان
قصيدة مصري فوق الستين عام فأكثر – عندي حنين –
عندى حنين لنهاركم سعيد
وزيارتك لينا تبقى يوم عيد
وإتفضلى يا هانم بأدب شديد
والكبار حتى لو غرب بناديهم أعمام وخلان
عندى حنين لفرن ستي البلدى
ومنشة وطربوش وشنب جدى
والكستور كان حنين على جلدى
والناس كلها بتصحى للشغل بهمة قبل الأدان.
عندى حنين لعسكرى الدورية
واﻷمان نص الليل والفجرية
والحب كان يادوب لمسة ايديها لإيديه
وﻻ بصة من عيون الحبيب تترعش لها اﻷبدان
عندى حنين للمدرس المحترم
اللى بصة منه توقفنا زى القلم
ولما يشرح نسكت كلنا ونتكتم
ومافيش درس خصوصى عشان كان إنسان.
عندى حنين لساعى البريد
والمكوى كانت حتة حديد
والتلغراف كان إختراع جديد
واللى عندة تليفزيون يبقى من بيت مليان….
عندى حنين لدورى الشوارع
وفأى عيد نزين الكنايس والجوامع
والكعك مدور والبسكوت صوابع
يعملوه بفرحة سوى أم فاطمة مع أم ماريان..
عندى حنين لبتاع البيانوﻻ
والمية زى الشهد من القلة
وكل بيت ﻻزم يكون فيه غلة
والسمنة والمش والعسل والجبنة على وجه خزان ؛
عندى حنين لصندوق الدنيا في بستارتة
واللى يشوفه يحكى على حلاوتة
يعدى كل أسبوع ويغير حكايتة
وصاحبه يحكى لنا الحكاية فشر البغبغان..
عندى حنين لجواز من غير فشخرة
والشبكة يادوب حاجة صغيرة
والشقة سهلة نجيبها متأجرة
وكل اللى عاوز يتجوز بسرعة يلاقى له مكان.
مع ان عندى حنين ليوم خميس كان معلوم
نجهز كلنا لسهرة الست أم كلثوم
والعيلة تتلم كلها من غير لوم
واسمع آهات الطرب من ابويا زى صوت الكمان
عندى حنين و الحنين دة تاعبنى
وخايف اﻷمل اللى جوايا يسيبنى
من هنا أسيب الهم دة لبنتى وإبنى
يورثوا زمن خالى من الضحكة والحب واﻷمان
وبتمنى يرجع الحب تانى جوانا
ويسكن الوطن من تانى حشانا
عندى حنين وعندى برضة أمل
بما أن الكره ف بلادنا يتقتل
وإن أكيد بعد المر دة فى عسل…
